Neem net foto's en los net voetspore," lui die ou-ou kennisgewing wat jy amper oral by al die mooi plekke in Suid-Afrika kry.

Die ander "voetspore" wat deesdae sy kop uitgesteek het... of sal ek liewer sê sy merk gemaak het, is die koolstofvoetspoor. Almal van ons dra by. Elke keer as jy 'n lig, verwarmer of jou kar aanskakel, loop die spore. En hoe meer dit raak, hoe minder is ons kans op oorlewing. Koolstofgas word vrygestel en dis die groot sondebok wanneer dit by aardverwarming kom.

Maar ek wil nie oor dié voetspore praat nie. As jy nou na bladsy 80 blaai, sal jy sien dat Johan Bakkes klaar is met die sneeuspore van Siberië en China en nou begin voetspore trap deur al die geskiedkundige watergate in ons land in sy nuwe reeks, Kroegkruip.

Eintlik wil ek ook nie oor sy voetspore praat nie. Ek wil oor ons almal se plaaslike voetspore praat. Ja, plaaslike toerisme. Vandat Suid-Afrika deel van die wêreld geword het, het al wat 'n Europeër, Kiwi, Australiër en Amerikaner is hier kom voetspore los.

Ons almal hier rond het brom-brom ons voete onder die tafel ingedruk en nie 'n tree versit nie. Want ons kon nie betaal vir al die skielike luukse nie.

Dis lankal nie meer so nie. Ja, daar is dalk nog 'n paar plekke wat te dik vir 'n daalder is, maar die meeste reisplekke weet aan watter kant hul brood gebotter is. Ek bedoel, weet jy hoe lekker kuier jy in Tonteldoos vir 'n tiekie? As jy nie weet waar Tonteldoos is nie, blaai na bladsy 76. En Paternoster op bladsy 44 is nou ook nie juis in die prysklas van die Franse Riviera nie (maar die kreef is lekkerder, groter en rooier). Of as jy in die Karoo is, gaan trap op Johan se diep spore in die Barrydale Karoo-hotel.

En as jy nou regtig voel jy kan nêrens heen bekostig nie, klim in die bed met jou Mooiloop en gaan op reis. Deur die Kalahari, Mosselbaai, Windhoek of regdeur vier Afrika-lande op Toyota se 4x4 Conservation Outreach.

Trap 'n lekker spoor en loop mooi.

Groetnis