November 2008

Is jy bekommerd oor die omgewing en wil daadwerklik iets doen om die skade wat reeds aangerig is, om te draai? Wel, ons maak dit vir jou maklik. Mooiloop bied elke maand aan lesers omgewingswenke. Stuur jou groen wenke en meegaande foto's van per e-pos aan bosstories@rsp.co.za.

Groen roete integreer mens en natuur
Die eerste biodiversiteitsroete ter wêreld lê in die hart van die Kaapse Blommeryk. Die Green Mountain-ekoroete (GMER) is die produk van sy bewaringsbewuste lede wat fokus op die bevordering van respek vir die natuur, maar terselfdertyd kommersiële en maatskaplike doelwitte erken.

Die doel van die roete is om die natuurlike omgewing te bewaar, maar ook om volhoubare ontwikkeling van plaaslike gemeenskappe en ondernemings aan te moedig. Die sirkelroete is sowat 75 kilometer lank en strek om die Groenlandbergreeks deur die grondgebied om Botrivier, Elgin, Grabouw, Houwhoek, Villiersdorp en Vyeboom.

Biodiversiteit se tradisionele definisie is die verskeidenheid van lewe in 'n gebied, wat die verskillende spesies en hul genetiese welstand, die verhouding tussen die spesies en die natuurlike areas waarbinne hulle voorkom insluit. Biodiversiteit is egter nie beperk tot die natuur nie; dit sluit in 'n menslike komponent rakende ons bydrae en interaksie met die kosmos.

Hierdie ekoroete is die "geleier" waardeur biodiversiteit en toerisme seepglad tot almal se voordeel geïntegreer word. Die bewarea het maatreëls vir die bewaring van inheemse fauna en flora, veral fynbos, ingestel, uitheemse plante suksesvol uitgeroei en streng brandbestrydingsmaatreëls word toegepas.

Die belangrikste stap was om die regering te oorreed om die wetgewing ten opsigte van natuurbewaring te verander en ondersteun.

Die Groenlandberg-bewarea is deel van die Kogelberg-biosfeer wat binne die Kaapse Blommeryk, die kleinste dog rykste blommeryk ter wêreld, lê. Dit is ook Suid-Afrika se jongste wêrelderfenisterrein.

Biosfere is "nuwe" konsepte waarin daar geen grensheinings tussen mens en natuur is nie. Die Kogelberg-biosfeer spog met 1 880 plantspesies, waarvan na raming 150 endemies is.

Maatskaplike opheffing
Vele werkgeleenthede word geskep sodra toerisme in 'n gebied soos dié rondom die GMER vastrapplek kry. Derhalwe word inwoners toegerus om tot toerisme by te dra deur die opleiding wat hulle ontvang van GMER-personeel danksy Cape Nature se Kogelberg-kleintoelaefonds. Hulle word touwys gemaak as toergidse vir fynbosstaproetes en hulle doen noodhulp- en bewaringskennis op.

Omdat elke boer in die gebied ook sy werkers aan omgewingsvriendelike boerderymetodes bekendstel, versprei die "groen" boodskap mettertyd na die hele gemeenskap.
Die roete oor die 34 000 hektaar van die Groenlandberg-bewarea bied heerlike doendinge en wynplase om te besoek. Verder is daar weelderige verblyf en kontreikos, varsprodukte-markte en plaasstalletjies en, vir die minder gastronomiese van aard, staproetes, blom- en voëlkyk-roetes, kajakker en kanovaart.

Kontak: 021 844 0975, info@greenmountain.co.za, www.greenmountain.co.za.

-------------------------------------

Oktober 2008
September 2008
Augustus 2008
Julie 2008
Junie 2008
Mei 2008