Junie 2008

Trap liggies
Om jou koolstofvoetspoor en sodoende las op die omgewing te verlig, is daar 'n hele klomp maklik bereikbare doelwitte. Mooiloop het gaan raad vra by die webwerf www.carbonfootprint.com.

Die mens se koolstofvoetspoor is 'n maatstaf om die invloed van ons aktiwiteite op die omgewing te bepaal ingevolge die hoeveelheid kweekhuisgasse wat ons produseer. Dié gasse word in eenhede van koolstofdioksied (CO2) bereken.

Verklein jou koolstofvoetspoor deur:

• Alle elektriese toestelle af te skakel wanneer jy dit nie gebruik nie (ook by die muur, nie net die toestel nie).
• Deur die temperatuur op die geiser net twee grade laer te stel, is reeds 'n groot tree vorentoe.
• Skakel eers die skottelgoedwasser en wasmasjien aan wanneer dit vol gelaai is - jy sal nie net elektrisiteit en water spaar nie, maar ook wasgoed- en opwasseep.
• Tap net genoeg water om die element te bedek as jy een koppie koffie wil maak, nie die hele ketel nie.
• Ontvries jou yskas en vrieskas gereeld vir doeltreffender werkverrigting.
• Moenie jou selfoon in die laaier laat wanneer die battery volgelaai is nie.
• Kombineer al jou weeklikse inkopies in een rit. Of stap winkels toe vir jou koerant, melk en brood.
• Tuimeldroërs vréét krag. Hang jou klere liewer in die son as jy kan.
• Draf gimnasium toe eerder as om in jou motor daarheen te gaan.
• Besoek www.carbonfootprint.com om jou koolstofvoetspoor te bereken en te sien hoe jy dit kan verminder.
• Stuur jou groen wenke per e-pos aan bosstories@rsp.co.za.
  

Bos toe om 'n baie goeie rede

Die Suid-Afrikaanse Omgewings-observasienetwerk (SAEON) se Ndlovu-nodus het vrywillgers nodig om die verspreiding van mopaniebome in die Krugerwildtuin en aangrensende private natuurreservate op te teken.

As aardverwarming-voorspellings bewaarheid word, sal mopanies verder suid en aan die westekant van die huidige verspreidingspatroon aangetref word omdat hoër temperature gunstiger groei-omstandighede vir dié boomsoort inhou. Jou hulp en tyd word benodig om die suidelike en westelike verspreidingsgrense van die mopanieboom vas te stel.

Die vrywillige dienslewering be-hels stap deur die Wildtuin en sy aangrensende natuurreservate en die aanteken van mopanies op 'n hand- globale posisioneringstelsel. Jy moet fiks wees, en twee of meer dae - weekdae of oor naweke - iewers tot einde Junie 2008 beskikbaar wees. Die basiese vaardighede sal aan vrywillgers geleer word en alle stappers sal van 'n gekwalifiseerde wildbewaarder vergesel word.

Afhangende van hoe lank jy beskikbaar is, sal reis- en verblyftoelae betaal kan word.

• Vir meer inligting en/of om jou naam op die vrywilligerslys te voeg: Nikki Stevens,
  013 735 3540, nikki@saeon.ac.za.
• Vir meer inligting rakende SAEON: www.saeon.ac.za.
  

Laat jou voertuig tuis

SACAB bied 'n veilige, betrou-bare en bekostigbare vervoer-oplossing in Johannesburg, Kaapstad, Durban en langs die Tuinroete. Die jongste tegnologie word in die 24 uur-inbelsentrum gebruik om seker te maak dat jy enige tyd van die dag of nag 'n geleentheid sal kry na jou bestemming. Deur saamry verlig ons die druk op paaie en verminder uitlaatgasbesoedeling.

• Vir meer inligting, besoek SACAB se webwerf by www.sacab.co.za.
• SACAB-inbelsentrum, 08611 SACAB / 08611 72222.

-------------------------------------

Mei 2008