Julie2008
Vlermuis-huise ís voordelig vir
die omgewing
Installeer 'n vlermuis-huisie aan die
kant van jou huis vir uiters omgewingsvriendelike
soogdiere in jou tuin. Vlermuise is dol
oor muskiete, is nie nadelig vir jou of
jou troeteldiere nie, en het geen behoefte
daaraan om in jou hare verstrengel te raak
nie.
Sowat 70 persent van alle vlermuise eet
insekte: vlieë, muskiete, besies en
kakkerlakke. En waar hulle mis, sal alles
geil groei. Een vlermuis-huisie kan tot
100 diere uisves wat tot 60 000 insekte
per aand kan verorber. Hulle raak dus "natuurlik"
ontslae van vlieënde en kruipende goggas
wat jou pla sonder dat jy 'n kannetjie gif
hoef in te span.
Maar hulle eet nie net nie, vlermuise bestuif
ook bome, blomme en vetplante, en versprei
sade sodat plante in nuwe gebiede kan groei.
As jy lief is vir avokadopere, piesangs,
dadels, vye, veselperskes en perskes - vlermuise
sal hul bestuiwing ook behartig.
Vlermuis-huisies kos R270, insluitend die
installeringskoste.
 Wes-Kaapse
wynplaas suiwer afvoerwater
Durbanville Hills is een van die eerste
wynkelders in die Wes-Kaap wat afvoerwater
herwin en suiwer ten einde water volhoubaar
te hergebruik. Die kelder het onlangs 'n
omgewingsvriendelike behandelingsaanleg
vir afvoerwater in werking gestel om dié
water vir besproeiing aan te wend.
Die proses begin wanneer die kelder se uitvloeisel
met swaartekrag tot in 'n opvangtenk vloei.
'n Rooster verwyder die soliede materiaal
soos pitte en doppe.
Die afvoerwater vloei dan na 'n vloeibalanstenk
waar die suurgehalte van die water in ewewig
gebring, voedingstowwe bygevoeg en lug in
'n enkele geaktiveerde slik-bioreaktor bygevoeg
word.
Die skoon water word dan na 'n opgaardam
gepomp om water aan 'n buurplaas te voorsien.
Bo en behalwe die nuwe aanleg wat die verdampingsdam
vervang, is daar ook 'n aërobiese belugter
wat die water mikrobiologies behandel en
belug om seker te maak dat die eindproduk
geen gevaar vir die omgewing inhou nie.
Martin Moore, Durbanville Hills se keldermeester,
sê dat die voltooiing van die nuwe
opgaardam hulle nou die geleentheid bied
om hul koolstofvrystellings daadwerklik
te verminder en water te spaar. "Die
gistingsproses skep baie koolsuurgas wat
in die lug ontsnap. Benewens wingerde wat
bykans tot by die voordeur voor die kelder
geplant is, het ons ook vier hektaar se
olyfbome aangeplant om koolsuurgas in suurstof
te omskep."
-------------------------------------
Junie
2008
Mei 2008 |
