Augustus 2008

Speel-speel na 'n groener Suid-Afrika

Ek staar na 'n foto van 'n klein bruin eekhoring wat met wye, beskuldigende oë na my kyk terwyl hy tandhap aan 'n sappige koerantstorie … Letterlik.

Dis Peanut, 'n mak eekhoring en permanente inwoner van die Renoster-en-leeu-natuurreservaat net buite Krugersdorp waar die Nasionale Natuurbewarings- en Opvoedingsprojek, Wildways Wildlife Challenge, onlangs bekendgestel is.

Die stigter van DJANI Wildlife-projekte, doktor Madelein Grundlingh, 'n gekwalifiseerde dierkundige en natuurbewaringspesialis, en Peanut maak jong leerlinge bewus van die lewensbelangrike verhouding tussen mens en dier. In kindertaal: as mense mors, sal diere die gemors eet - wat lei tot verteringsprobleme en vergiftiging. Peanut se dood klink dalk onbelangrik, maar selfs hierdie klein, skynbaar nuttelose dier is noodsaaklik in die lewensiklus.

Die mens is die mees verwoestende spesie op aarde en indien kinders nie van jongs af geleer word om die natuur te respekteer nie, sal daar vóór jy "grondboontjie" kan sê niks meer oor wees om te bewaar nie.

Die ewigdurende stryd tussen mens en dier vervreem kinders al hoe meer van die natuur. Die oplossing is bewusmaking.

Ná intensiewe navorsing het Madelein met 'n manier waarop kinders speel-speel meer oor die natuur kan leer vorendag gekom, want "kinders leer die beste wanneer hulle speel". Haar kaartspeletjie, WildWays Wildlife Trump Card Series, is 'n prettige manier om meer van die natuur te leer en bevat inligting oor meer as 180 verskillende spesies, insluitend soogdiere, voëls en reptiele.

Speel-speel, tjoef-tjaf. Leer-leer. Madelein hoop dat die kaartspeletjie in elke skoolsillabus ingesluit sal word - dit is reeds by sommige skole deel van die leerplan.

Televisie-aanbieder Michelle Garforth steun die projek omdat dit vir haar "fantasties is om te sien hoeveel kennis kinders uit die speletjie kry, asook die hoeveelheid pret wat die hele gesin in die proses het".

Daar word ook einde vanjaar 'n kompetisie by deelnemende skole gehou wat onder meer deelnemers se natuurkennis op grond van die kaarte gaan toets. Jong fotograwe kan ook hul beste natuurfoto's inskryf - die bestes sal uitgestal word by DJANI Wildlife Projects. Daar is groot pryse op die spel.

Aan die einde van die dag sien ek hoe 'n paar kinders met nóg 'n inwoner van die reservaart, 'n mak maraboe, speel. Ek dink aan die groot taak wat op hul smal skouers rus en voel bedruk. Ek kyk egter dieper, sien hul glimlaggende gesigte en hoe versigtig hulle die voël hanteer. Madelein se woorde flits deur my gedagtes: "Kennis van ons omgewing en medespesies lei tot respek en meegevoel", en skielik lyk die toekoms glad nie meer so donker nie. - Helene Olivier

• Vir meer inligting: besoek WildWays Wildlife Challenge op www.djaniwildlife.co.za en raak leer-leer deel van die groen golf.
• Stuur jou groen wenke en meegaande foto's van per e-pos aan bosstories@rsp.co.za.
  
  -------------------------------------

Julie 2008
Junie 2008
Mei 2008