|
Bosstories
Briewe, reisverslae, nuusflitse en saakmaakstories
Mei 2008
 Kampeerwaens
se lof is onbesonge
Ek lees graag tydskrifte en artikels oor
die buitelewe en kampering, maar artikels
en rubrieke oor kampeerwaens of woonbussies
of motorwoonwaens is skaars. Daar is min
kampeerwaens op dié land se paaie
en die belangstelling daarvoor is skynbaar
beperk. Die verhouding van kampeerwaens
tot woonwaens in Suider-Afrika is waarskynlik
na aan 1:100.
Ons het 'n paar jaar gelede 'n kampeerwa
gekoop en reeds 'n hele paar roetes in Suider-Afrika
onderneem - van Tietiesbaai tot by St. Lucia,
die Krugerwildtuin, Drakensberg, deur Botswana
tot by die Okavango-delta, in die Caprivistrook
af verby Sossusvlei en die Weskus.
Ons spring gereeld sonder veel beplanning
in Skillie vir 'n sonsondergang met 'n bottel
wyn by die see of vir 'n kort naweek weg.
Ons het 'n tydjie gelede deur Europa met
'n kampeerwa getoer en dadelik opgemerk
dat daar veel minder woonwaens is. Besienswaardighede
in Europa is nader aan mekaar en mense is
grootliks deurryers wat dikwels net oornag
op 'n plek, pleks van lang statiese kampvakansies
hou.
Die belangstelling in Suider-Afrika neem
vinnig toe namate kampeerders meer geriewe
wil hê en nie meer lus is vir tent
opslaan en woonwa sleep nie. Die koste van
'n kampeerwa word vir al hoe meer kampeerders
'n kleiner oorweging, veral omdat 'n groot
persentasie woonwa-eienaars 'n groter trekvoertuig
vir dié doel moet hê.
Ons maak 'n punt daarvan om met oorsese
toeriste wat kampeerwaens huur gesprekke
aan te knoop en vir hulle te wys hoe 'n
mens in Suid-Afrika braai. Uit meer as 20
sulke ontmoetings was feitlik almal Europeërs,
veral van Nederland en Duitsland, wat ons
land ry-ry verken. Een groep wat ons op
Stellenbosch ontmoet het, was De Wielrijders
Bond van Nederland wat kampeerwaens gehuur
het en gaande was oor ons land en wat graag
weer sal wil kom toer. Omdat Europeërs
gewoond is aan kampeerwaens, is ek oortuig
daarvan dat ons kampeerwa-verhuringsbedryf
in 2010 nie in die helfte van die vraag
sal kan voorsien nie. Dit sal vuurmaak onder
die bedryf.
Jul tydskrif kan die nodige inligting aan
jul lesers deurgee, en ek vermoed meer mense
sal tydskrifte wil koop wat oor dié
kampstyl skryf. Die belangstelling is te
groot as om net nou en dan iets daaroor
te skryf. Omdat dit 'n nuwe belangstellingsveld
is, is daar juis baie vrae, baie ontdekkings
en baie geleenthede soos die kampeerwa-ruilskemas
met oorsese eienaars.
Hoe lyk dit, gaan julle vir ons inligting
oor die kampeerstyl gee?
Rocco Hough, Bellville
- Dankie vir die interessante brief,
Rocco. Soos jy sê, kampeerwaens is
gewilder in ander lande en daarom het ons
penne nog nie dié pad geloop nie.
Ons hoor graag van ander lesers of hulle
meer oor dié kampstyl te wete wil
kom. Skryf aan bosstories@rsp.co.za.
- Gerrit
Hallo uit die koue
 Ek
skryf vir julle vanaf die Sanae IV-basis,
Antarktika. Ja, hier vanaf die Suidpool-vasteland.
Ek het die Maart 2008-uitgawe van Wegbreek
(seker nou Mooiloop) ontvang met die laaste
inkomende vlug van Suid-Afrika. My vriendin
kon vir my die eksemplaar stuur.
Ek geniet jul artikels baie. Die artikel
oor "witgoud" het my dadelik herinner
aan my toepassing van toiletpapier. Ek was
verras om dan te sien dat julle 'n kompetisie
uitgeskryf het rakende die menige gebruike
van witgoud.
Terloops, net vinnige feite rakende Sanae
IV - die basis is geleë op die koördinate
71º40'S 2º51'W op 'n klein berg,
die Vesles-karvet. Ek is deel van die oorwinteringspan
(ons is 10 lede) en ons is van einde Desember
2007 af hier. Ons verwag om weer teen einde
Februarie 2009 met die SA Agulhas in die
Kaap aan te land.
Besoek gerus ons webwerf www.sanap.org.za/sanae_team.html
of gaan na Google Earth (soek vir die Vesles-karvet).
Dankie vir jul puik tydskrif, doe so voort!
Warm groete uit 'n koue plek!
Gerhard Laubscher, Sanae IV-basis, Antarktika
Witgoud-wengebruik
 Wat
is lekkerder as die reuk en smaak van vars
drup-koffie, veral met sonsopkoms, op reis
na wie-weet-waar? Ek en my vriendin het
een lente-naweek voor sonop in die Weskuspad
geval om die dag tussen die blomme en in
die natuur deur te bring. Ons lus vir drup-koffie
het ons tonge van vroegoggend geterg.
Met sonsopkoms het ons 'n pragtige afdraaiplek
raakgery en met groot verwagting ons kosmandjie
uitgepak. O, wee! Watter teleurstelling,
ek het die filtreerpapier van die 12?V-perkoleerdertjie
vergeet!
Dis wanneer 'n mens die waarde van witgoud
kan bepaal. Ons pak altyd 'n rol (wit) toiletpapier
in. Met 'n vinnige paar voue het ek 'n filter
gevorm en minute daarna het ons met stomende
koffie uitgekyk hoe die son die wêreld
om ons inkleur. Dankie, witgoud!
Gerhard Laubscher, Antarktika
Laat wiel en laat wyn
Vanjaar hou die Robertson-wynvallei groot
makietie met sy vyfde Wacky Wine-naweek
van 6 tot 8 Junie 2008. En dit gaan 'n feestelikheid
wees soos nog nooit nie - meer as 40 wynkelders
gaan deelneem.
Behalwe die jaarlikse doendinge op die
naweekprogram soos 'n halfmarathon, bergfietsuitdaging,
bootvaarte, trekkerritte en musiek, sal
daar ook geleentheid wees om die wynmakers
te ontmoet. Nuwe items op die program is
die Ferrari-klub wat 'n vinnige draai sal
gooi om sy speelgoed te vertoon, akrobatiese
vertonings deur die Zip-Zap-sirkus en syspan-motorfietsritte
vir 'n ieder en 'n elk. En saans 'n vuurwerk-vertoning.
Dit gaan ook 'n ware koskarnaval wees met
tradisionele Boere- en potjiekos, pieknieks
langs die rivier, Italiaanse kos en soesji.
Kinder-doendinge sluit visvang, gesigverf,
ponieritte, kettieskiet en die voer van
plaasdiere in.
Die gewilde Buddy Bus sal weer op sy pos
wees. Dit kos R40 per paspoort wat by enige
eerste proeplek gekoop kan word en sluit
proeglase, 'n geskenkpak en 'n program wat
spesiale aanbiedinge bevat in.
Vir meer inligting, 023 626 3167, manager@robertsonwinevalley.com,
www.wackywineweekend.com.
Ou volstruis hy wink so
 "Uiteindelik!
'n Praktiese handleiding waarin daar stap
vir stap verduidelik word hoe om volstruisies
suksesvol groot te maak."
Só skryf Landbouweekblad oor Petro
Strydom se The Ostrich Farm - how to get
started.
En ja, selfs volstruise pik op mekaar -
maar dis gewoonlik net die siekes wat deurloop.
Petro vervat 15 jaar se ondervinding in
dié handleiding oor alle aspekte
van volstruis-grootmaak. Die handleiding
is ook ryklik geïllustreer.
Toe, dalk droom jy nog altyd van volstruise
grootmaak. The Ostrich Farm - how to get
started (uitgewer: Procure) is ook nuttig
vir skooltake en studente-werkstukke. Die
sagteband-boek kos R250 en kan regstreeks
van Petro bestel word.
Vir meer inligting en bestellings: Petro
Strydom, Posbus 1235, Jeffreysbaai 6330.
Bel 082 659 2529 of skryf aan houtboschbay@absamail.co.za.
Wen
Drie gelukkige lesers kan elk een van Petro
Strydom se handleiding The Ostrich Farm
- how to get started wen. [kliek
hier]
Skubaduik stap vir stap
 Skubaduik
in aksie is 'n handleiding met 'n DVD van
30 minute en kleurfoto's vir beginners of
gesoute duikers wat hul duikvaardigheid
wil verfyn en opknap.
Hierdie ten volle geïntegreerde boek
en DVD sal jou inspireer om dadelik te begin
duik. Dit vertel jou alles wat jy moet weet
om veilig en met selfvertroue te kan begin
duik.
Kruisverwysings na die DVD is ingesluit
op bladsye wat gerugsteun word deur beeldmateriaal.
Kleurfoto's lig elke stap in die fynste
besonderhede uit. Duikveiligheid en fiksheid
asook die werking, hantering en gebruik
van alle toerusting kry aandag.
Beginners, ervare duikers asook duikoperateurs
sal die boek as 'n nuttige hulpmiddel kan
gebruik. Agterin die boek is 'n volledige
inligtingsblad oor duikorganisasies, bewaringsinstansies
en kontakbesonderhede.
Die boek is die derde titel in die In aksie-reeks:
Gholf in aksie en Tennis in aksie is ook
saam met DVD's beskikbaar.
Die verkoopprys is R169.
Vir meer inligting en bestellings: David
Koekemoer, 012 329 3896, david@briza.co.za,
www.briza.co.za.
Wen
Een gelukkige lesers kan elk 'n Skubaduik
in aksie-handleiding wen. [kliek
hier]
Ontdek die Magaliesberg
 Dis
nie aldag dat iets verniet is nie, en as
dit boonop 'n gids na een van die land se
lekkerste kuierplekke is, is dit des te
beter.
Discover the Magaliesberg, 'n volledige
gids van 64 bladsye oor blyplekke, doendinge
en waar om wat in die omgewing te sien,
is gratis beskikbaar by die meeste toerismekiosks
in Gauteng. Die omgewing is bekend vir sy
ongerepte natuur, ryk voël- en soogdierlewe
en diverse kultuur en geskiedenis. Die boek
is uitgegee deur die Magalies Meander.
Vir 'n gratis eksemplaar, skryf aan info@magaliesmeander.co.za.
Johan Bakkes-boekbekendstelling
 Ná
Johan Bakkes se suksesvolle kortverhaalbundels,
Moer toe die vreemde in en Nou's ons in
ons donner in, is sy stories - gevul met
dieselfde opwinding en skoonheid as die
gewilde oorspronklike titels - in die Engelse
vertaling To Hell and Gone beskikbaar.
To Hell and Gone vertel van Johan se talle
reise en buitengewone ervarings. Of dit
nou gaan oor die uitklim van Ras Deshen,
die hoogste kruin in Ethiopië, of 'n
reis na die Danakil-woestyn, een van die
onherbergsaamste gebiede op aarde, of wedervaringe
veel nader aan die huis. Dié boek
maak die avonturier in elke leser wakker
en is die ideale geskenk aan 'n Ingelsman
wat moet weet van, maar nie die Boer se
taal magtig is nie.
Lesers kan Johan en sy skrywer-kleinboet
Christiaan (Skuilplek, Stoffel by die afdraaipad,
Stoffel se veldnotas) in Kaapstad en Centurion
tydens die boekbekendstellings ontmoet wanneer
hy 'n storie of wat sal vertel en boeke
sal teken.
Die funksies vind plaas te Cavendish Square
Exclusive Books, Kaapstad, 20 Mei, en Centurion
Exclusive Books, Pretoria, 26 Mei.
Vir meer inligting en om die geleenthede
by te woon: Alicia Hendriks, NB Uitgewers,
021 406 3477, alicia.hendriks@nb.co.za.
Wen
Vier gelukkige lesers kan elk een van Johan
Bakkes se verhaalbundel To Hell and Gone
wen. [kliek
hier] |
Koos
Kombuis-konsert by die Bushman's Cave-bergteater
uitgestel tot ’n latere datum. 
