Bosstories Briewe, reisverslae, nuusflitse en saakmaakstories

Maart 2008

Stellenbosse Woordfees 2008
Stap saam en deel in fees van woorde
Berei jou voor op die aptytlikheid van 'n leeftyd. Die Stellenbosse Woordfees vanaf 3 tot 9 Maart 2008 se feestema is "So is my tafel gedek", en Wegbreek help ook aan dié spyskaart van opwindende Afrikaanse letterkunde skryf.

Kom toer saam met ons tydens die unieke produksie Troebatoer op Donderdag 6 Maart om 20:00 by die buitelugverhoog van Klein Libertas-teater en geniet 'n piekniekmandjie vol padkos en verrassings.

Wegbreek was mos die eerste wat die konsep van musiek wat kunstenaars laat reis en reise wat kunstenaars laat musiek maak aan die groot klok gehang het.

Teen R100 per persoon kan jy luister na die Radio Kalahari Orkes, Rian Malan, Valiant Swart, Koos Kombuis en Schalk Joubert se Kayamandi Kids. Die akteur en Radio Kalahari Orkes-lid Ian Roberts sal die reis onvergeetlik maak met stories vol klanke. 'n Lekker padkos-pakkie is ook ingesluit by die prys.

Slingerstap
Stellenbosch is welbekend as een van Suid-Afrika se voorste wyndorpe en wat is 'n fees sonder wyn? Die Woordfees en Wegbreek bring vanjaar die wynroete na jóú toe.

Stap die Wegbreek-wynroete en kom proe die Boland se heel beste van vroeg tot laat. Wynplase soos Neil Ellis, Vergenoegd, Flagstone, Deetlefs, Mooiplaas, Knorhoek, Groenland, Morgenster en Spier neem deel.

Die roete kan sit-sit vanaf Vrydag 7 Maart tot Sondag 9 Maart afgelê word.

Wynplase en sommige restaurante in die gebied span saam en bied wonderlike promosies en wynproe-geleenthede aan, spesiaal vir die Woordfees.
Die restaurante hef nie 'n toegangs-tarief nie en bied 'n lafenis vir die tye tussen produksies.

Proe wyn. Loop van restaurant tot restaurant. Of ontspan aan tafel en geniet 'n heerlike ete met 'n glasie wyn.

Entrepreneursmark
Met die tema "So is my tafel gedek" kry jy ook verskeie vrolike tafels by die Woordfees. Al die stalletjies word deur leerders aangebied en beman, met smullekker eetgoed, poppekas, kinderteater en vele meer. Onder Ryneveldstraat se akkerbome; 7 Maart, 17:00 tot 20:00 en 8 Maart, 9:00 tot 16:00. Bel Magdel Meyer by 021 808 2901, woord@sun.ac.za.

- Troebatoer-besprekings en volledige feesprogram: 021 808 3513, fees@sun.ac.za, www.woordfees.co.za.

Dis tyd om te groet, Afrika roep
'n Jaar van beplanning en padkaarte bekyk, is verby - 15 Maart 2008 is om die draai. Die storie van my droom om per motorfiets deur Afrika na Europa te toer, gaan nou begin.

My laaste, lang toetsrit het my einde November na Kaapstad geneem. Op pad het ek in Clanwilliam vir my rooi voetegoed gekoop; daardie soort wat David Kramer bekend gemaak het. Nou het die sterre reggestaan en agterop my bagasie het ek 'n paar rooi skoene vasgebind. Daar het hulle elke dag gery tot ek 5 000 kilometer verder in Mookgopong gestop het.

Van Clanwilliam is ek noord, verby Bitterfontein waar Suid-Afrika se grootste diamantroof lank gelede gebeur het (en steeds onopgelos is). By die vleiswerke daar (ek is mal oor die eiesoortige taalgebruik van die Namakwalanders) het ek vir my droëwors gekoop en dit in die karige skadu voor die slaghuis geëet.

Tussen die rotskoppe en -klowe van die pad tussen Garies en Kamieskroon het die ruwe skoonheid van die gebied in my reissiel kom sit, en het name soos Jan Dirk se Kop, Handjieskraal se Berg, en Soetheuningberg my laat verlang na 'n boeredans op 'n plaas in Namakwaland. Dit wil ek in die tweede helfte van die jaar doen.

By Steinkopf het ek 'n roosterbrood by twee Namavroue in hul matjieshut gekoop. Ek het die hele dag aan die brood geëet en aan 'n lewe in matjieshutte gedink.
Die bloedige somerhitte van die pad tussen Vioolsdrif en Grunau was vir my skrikwekkend. Is dit hoe dit in die Sahara gaan wees?

Keetmanshoop, Windhoek, Okahandja, Grootfontein het plekname agter my geword. My KLR het die bloedige hitte en swaar vrag soos 'n droom hanteer, en vir ure aaneen was die eensilinder se eiesoortige dreuning my enigste geselskap.

Toe ek Kavango binnery, kon ek dadelik die verskil opmerk. Ek was in Afrika. Kinders het langs die pad die Okavango-lemoene (nee, nie regte lemoene nie) verkoop. Vroue het mahango in hul houtblokke tot meel gestamp. Oos van Rundu het ek op 'n grondpad langs die Kavangorivier gery en gesien hoe 'n man met pyl en boog vis jag. 'n Groep vroue was op pad na 'n tradisionele dans vir hul oumense, en Katura Engelbertha van die dansgroep het vir my 'n armband gegee om my reis deur die Kavango en Caprivi voorspoedig te maak.

In Katima Mulilo het ek in 'n ou offisiersmenasie van die Suid-Afrikaanse Lugmag oornag. As die mure van die kamers en die kroegie net kon vertel van 'n lewe 'n paar dekades gelede...

Ek kan net dink wat nog op my wag. Ek is bang dat Europa ná Afrika teleurstellend gaan wees. Ek wonder soms of ek werklik wil ophou ry. Wie weet waar die eindpunt van Naboom2Germany gaan lê?

Maar vir nou gaan ek op wonderlike Afrika konsentreer. Ek sal julle laat weet wanneer die Suiderkruis vir oulaas agter die horison verdwyn het.

Afrika-groete
Lodie de Jager
www.naboom2germany.co.za
lodie@naboom2germany.co.za

· Volg Lodie se Met my rug na die Suiderkruis-reis onder die Blogs-kategorie. Hy spring op 15 Maart 2008 in Mookgopong met sy Kawasaki KLR 650-motorfiets weg en wil op 15 Junie 2008 in Duitsland stop.

· As jy belangstel om ook te blog, stuur 'n e-pos aan bosstories@rsp.co.za met meer inligting oor jou reisplanne. Blog-deelname is gratis en kommentaar op ons blog-skrywers se ervaringe word op die webwerf verwelkom.

20 Hummers hum saam
Op 'n Saterdag in Desember 2007 het sowat 20 Hummers in die Atlantis-duine buite Kaapstad - waar 4x4-ry toelaatbaar is - byeengekom om die uitgestrekte duine te takel. Maar voor die bestuurders die 4x4's op die proef kon stel, het die toerleier, Johann Meyer van JB'S Auto Repairs, eers die moets en moenies uiteengesit.

"Een fout op 'n duin en 'n voertuig kan rol," het hy gewaarsku. "Deur nie in mekaar se spore te bly nie, kan iemand maklik verdwaal. En geen alkohol tydens die rit nie, want dan kan jy 'n oordeelsfout met noodlotige gevolge gemaak."

Teen die einde van die bespreking kon die manne nie meer wag nie. Twee toere was op die agenda, die eerste 'n besigtigingstoer en die tweede vir dié wat vir 'n groter uitdaging kans sien.

Van die nasionale pad af kan 'n mens nie glo dat die duine so mooi kan wees nie. Hulle maak sagte kurwes en die sand is wit en pragtig. Mense wat die duine gereeld ry, sal saamstem dat die duine nie een dag dieselfde is nie. Die wind gee telkens aan die duine nuwe lêplek. Atlantis is 'n eie woestyn.

Die 4x4-bestuurders het egter gou besef dit is nie net van inklim en ry nie; daar is vele tegniese punte hoe om die voertuie te beheer met die op- en afgaan van 'n duin.

En die duine praat saam; hulle brul letterlik as jy met die sand afry.

Die Hummers beweeg soos 'n lang trein, die een agter die ander en hier en daar stop een en draai terug as die duin te skerp af is. Vir die eerstekeer-ryers is dit 'n groot avontuur.

By 'n hindernis moet Johann eers wys hoe die dinge gedoen moet word. Een ná die ander gaan die Hummers daardeur, soos seuntjies met stink-splinternuwe speelgoed.

En daar spring 'n voorste band van die naaf af! Maar dit is vir Johann sommer die geleentheid om vir almal te wys hoe om 'n band vinnig terug te sit sonder om die wiel te vervang.

By die volgende hindernis, die Lang Duin soos wat hy bekend staan, word almal eers weer touwys gemaak. Die ander 4x4's se bestuurders staan verbaas en kyk. Hulle kan nie gló dat die Hummers daar sal uitkom nie. Maar hulle kán. Walter Golding, wat die duin al vlieënde oorgekom het, kry summier die naam Mister Red Bull.

Die dag was net te kort en almal moes huis toe gaan en die onvergeetlike duine agterlaat sodat die naglewe sy gang in die woestyn kan gaan.

Marnette Meyer

Droëkeel-Kalahari se moses
Die Noord-Kaap is 'n plek waardeur 'n mens dink om sommer te laat wiel. Maar daar is 'n lafenis wat 'n mens nie sommer verwag nie: 'n kelder.

Die wynlande van die Benede-Oranje is geleë op die rand van die Kalahari al langs die rivierloop van die Oranje. Op Upington vind jy die hoofkantoor van Oranjerivierwynkelders. Wie het kon dink dat vyf wynkelders en twee sapkelders in Kakamas, Keimoes, Upington, Kanoneiland, Grootdrink en Groblershoop kan skuilhou.

· Wen: Vyf kiste Oranjerivierwynkelders-wyn ter waarde van R90 elk. Blaai na bladsy 7 in die Maart 2008-uitgawe vir meer inligting of kliek hier.

Jongmeisieboudjies in witblits
Wegbreek-medewerker Dine van Zyl se jongste boek, Agter die Lekker
aan, is 'n vrolike kosboek vir die smul-leser. Dit gaan oor "die kos wat ons
eet, met wenke en wyshede, en die dinge wat die oumense vertel het".

Die boek lees soos 'n roman met al die vrolike staaltjies en vertellings. Tog is die lekkerlees-styl misleidend, want die samestelling van die boek het baie navorsing en kennis geverg.

"Ek wou nie 'n koffietafelboek skryf nie," sê Dine. "Ek wou skryf vir mense wat hunker na regte kos. Wat hou van die 'tjiep' van die vleismeul en die afskil van 'n bokkom en die vier keer smeer-en-vou van skilferkorsdeeg. Mense wat gerus voel as skaapskenkels op die stoof stowe en karringmelkpoeding in die oond bak en appelkose stuitig soos jongmeisieboudjies in die witblits lê.

"Die boek is vir mense wat ernstig is oor eet - mense wat kwyl oor die geur van uieringe wat in die pan braai, bros van buite en soet en sag van binne. Mense wat bene afkou en visgrate uitsuig en wat 'n blusaartappel stomend oopbreek en 'n oomblik stilstaan om die grond en die goedheid in te asem."

Die volkleurboek het foto's van mense wat kuier. Nie een van die foto's is geposeer of die kos gestileer nie. Dit is regte kos vir regte mense. Potjiekos, braaivleis, snoekstories, kreefstories en die spyker in die doodskis, wat die soetigheidjie vir agterna is.

· Wegbreek-lesers kan Agter die Lekker Aan teen die spesiale prys van R230 bestel, BTW, posgeld en verpakking ingesluit. Meld wie die inbetaling doen en e-pos betalingbesonderhede, kontaknommer en posadres aan: dinevanzyl@iafrica.com.
Bankbesonderhede: G. van Zyl, Absa Bank, Hermanus, takkode 334812 en tjekrekening 4050699623.

Hou die bobbejaan agter die bult

Dit gebeur meer dikwels dat woonbuurte en boerderye in voorheen ongerepte natuuromgewings tot stand kom, binne die natuurlike habitat van bobbejaan en ape. Dié uitgeslape diere is deeglik bewus van die toegang tot voedsel wat die mens en boerderye inhou en gee daarom nie pad nie.

Daar is nou aan 'n beter, veiliger manier gedink om bobbejane en ape weg te hou van woonbuurte, maar gelukkig terselfdertyd hul voortbestaan te verseker.
Baboon Watch is 'n stelsel wat deur die Suid-Afrikaanse uitvinder Doug Deid ontwikkel is.

Dit is volgens die vervaardigers 'n moet vir alle huiseienaars wat in 'n omgewing bly waar bobbejane en ape moles maak. Die weerbestande, geslote kringkamera-stelsel behels 'n skadelose, maar hoëfrekwensieklank wat die bobbejane en ape weghou en menssku maak.

Nou hoef boere nie meer wrede stappe te doen om hul boerderye te beskerm nie.

Baboon Watch kan permanent buitenshuis geïnstaleer word en genereer klank teen 'n veranderlike frekwensie. Dit bring 'n hoë, ongemaklike klank voort en sal die bobbejane en ape weghou van die gebied. Die frekwensie is verstelbaar van hoorbaar tot geluidloos.

Die toestel se effektiewe afstand is min of meer 30 meter, maar 'n addisionele reikwydte van 20 meter is ook moontlik.

· Vir meer inligting, bel 044 534 8280, 083 301 7044, e-pos info@dazer.co.za of besoek www.dazer.co.za.

Sakelui moet sweet
Met al Eskom se kaperjolle, die JSE en wêreldmarkte wat duik en die politieke onsekerhede sedert Polokwane het sakelui in Suid-Afrika nogal 'n klompie uitdagings om mee rekening te hou.

Hier is 'n uitdaging van 'n gesonder aard: Die South African Challenger World Event.

Challenger World-geleenthede hou 'n reeks mededingende uitdagings in wat samewerking vir sakedoeleindes onder deel-nemende spanne bevorder. Die doel is om die spanne te beloon vir hul strategiese beplanning, kommunikasievaardighede, groepsamewerking asook fiksheid en uithouvermoë.

Oor die verloop van twee dae en drie nagte word die mededingende korporatiewe spanne gekonfronteer met 'n reeks uitdagings, elk met die oog op 'n spesifieke vaardigheid.

Die uitdaging vind van 15 tot 18 Mei 2008 in die Breedekloofvallei in die Wes-Kaap plaas.

· Vir meer inligting rakende die Challenger World Event, bel 021 685 6219, e-pos monique@challengerworld.co.za of besoek www.challengerworld.co.za.