Bosstories Briewe, reisverslae,
nuusflitse en saakmaakstories
Februarie 2008
Wegbreek is mos ons mense
Partykeer is dit goed om te erken dat hardkoppigheid
'n ou partykeer dinge laat miskyk.
Ná die naamsdebakel tussen Getaway
en Weg het ek daar en dan besluit
- daar's nie 'n manier dat ek ooit die Afrikaanse
Getaway naamlik Wegbreek sal
ondersteun nie. Met die "vyand" sal ek nie
heul nie.
Maar 'n dokter se spreekkamer laat jou snaakse
dinge doen - soos om deur die November 2007-uitgawe
van Wegbreek te blaai. Wat 'n aangename
verrassing - iets heel anders as wat ek
gedink het dit sal wees en vir seker nie
'n vertaling van Getaway nie. Wegbreek
het 'n totale ander aanslag met heerlike
artikels wat nié uit Engels kom nie. Die
rubrieke is 'n plesier. Boekeloer en Radio
langpad. Chris Barnard se stories was nog
altyd my gunsteling, al van Chriskras
se dae af.
Hierdie is nie die "vyand" nie; dis "ons
mense" dié, besef ek.
'n Gewone reistydskrif is dit nie. Ook is
ek bly dat julle nie geheel en al in die
slagyster van meer geelbladsye (die advertensies
aan die agterkant) as sinvolle artikels
en inligting verval het nie. Ek besef 'n
tydskrif se brandstof is advertensies, maar
ek sal daardeur blaai as ek regtig na iets
op soek is. Ek koop 'n tydskrif om te reis
deur dit wat die skrywer en fotograaf aan
my opdis.
So doe so voort. Ek sien uit na die volgende
uitgawe.
Wat van 'n ander naam? Ha-ha!
Ockert van Tonder, Durbanville
 Die
bul is terug
Die Bull of Africa, Suid-Afrika se brahmaan-ekspedisie-avontuurresies
is terug op die ekstreme-atletiekkalender
en vind plaas van 9 tot 16 Augustus 2008.
Die eerste Bull is in 2004 aangebied toe
'n Kanadese span onder leiding van Lawrence
Foster gewen het.
Vanjaar se sewedag-vasbyt oor ruwe terrein
in die Oos-Kaap en aan die Wildekus sal
meer as 30 plaaslike en internasionale avontuur-atlete
lok wat hul vernuf sal toets in onder meer
see- en rivierroei, bergfietsry, swem, navigasie
en takelwerk op uiterste plekke. Duiselingwekkende
kuskranse, wortelboom-moerasse, inheemse
woude en Groot Vyf-reservate is deel van
die roete. Die Bull of Africa begin op Vrouedag
(9 Augustus) en sal op dié dag aandag skenk
aan vroue wat in avontuur-wedrenne vooruitgang
maak. 'n Afsonderlike vroue-kategorie sal
aan spanne van Suid-Afrika, Brasilië, Amerika
en Nieu-Seeland die geleentheid bied om
die bul by die horings te pak. Prysgeld
beloop R300 000 en die Bull is 'n kwalifiserende
resies vir die Wêreld-avontuurresies-uitdaging
wat in Oktober in Brasilië plaasvind. Dit
sal die eindpunt wees van 'n jaar se swoeg
en sweet waarin 10 lande soortgelyke professionele
wedrenne aangebied het.
 2008
Suid-Afrikaanse Kaasfees
Laat die aardse geure van kaas jou lok na
die Suid-Afrikaanse Kaasfees vanaf 25 tot
28 April 2008 op die boomryke historiese
Bien Donné-plaas op die Bolandse platteland
tussen Franschhoek en die Paarl.
Van Suid-Afrika se legendariese kampioenkase
en nuwe variëteite sal kaasliefhebbers verlei.
Voorste wyne, olywe en varsgebakte brood
word ook gebied. Besoekers sal ook die unieke
geleentheid kry om plaaslike kase met hul
Franse eweknieë, wat spesiaal vir dié geleentheid
ingevoer is, te vergelyk.
Die hekke sal oop wees van Vrydag tot Sondag
tussen 10:00 en 18:00, en Maandag 28 April
van 10:00 tot 17:00. Toegang is R75 per
persoon, senior burgers betaal R45 en onder
12's kom gratis. Getalle word beperk en
kaartjies sal vanaf 1 Februarie by Computicket
beskikbaar wees. o Vir meer inligting bel
Agri-Expo by 021 975 4440, cheese@agriexpo.co.za,
www.cheesefestival.co.za.
Luister hierna
As jy van plan is om vanjaar Namibië te
besoek, sal Tourism Radio Namibië (TRN),
wat spesifiek vir die selfrytoeris ontwikkel
is, jou reis aansienlik verge-maklik. Dié
radiostasie is 'n ligging-gebaseerde inligtingsdiens
wat daartoe bydra dat selfrytoeriste hul
reis deur en deur geniet.
TRN is beskikbaar via 'n klein toestel wat
in 'n voertuig geïnstalleer word. Gerugsteun
deur satellietbeheerde GPS-inligtingspunt-tegnologie
word inligting insluitend tradisionele restaurante,
blyplekke of historiese landmerke in die
area waardeur jy ry, via die motorradio
uitgesaai.
Die padveiligheidsaspek kry aandag deur
die bestuurder vroegtydig te waarsku teen
skerp draaie, bulte en bedrieglike rivierkruisings.
Volledige inligting oor hoe om op 'n grondpad
te bestuur en al die moets en moenies van
grondpadry word breedvoerig uitgesaai.
Benewens streeksinligting saai die stasie
ook meer as 400 eg Namibiese programme uit
wanneer jy op sieldodende paaie soos byvoorbeeld
dié tussen Mariental en Keetmanshoop of
Nata en Maun ry. Alle roetes in Namibië
en noordelike Botswana word gedek - vanaf
Alexanderbaai en die Kgalagadi-oorgrenspark
in die suide, noordelike Botswana op tot
by Victoria Falls en Livingstone in Zambië
tot Ruacana en Terrace Bay aan die Namibiese
weskus.
Die huur van die toestel kos R75 per dag,
installering is maklik en jy kan dit binne
sekondes gebruik.
 Wegbreek
ry saam
Ons het vanaf Pretoria deur Botswana na
Walvisbaai in Namibië gery. Ons het om 10:00
op 'n Sondagoggend in die pad geval en 'n
goeie 12 ure later in Gobabis, Namibië,
oorgeslaap.
Die volgende dag was ons batterye herlaai
en het ons die pad na Walvisbaai aangedurf.
Die roete van sowat 1 900 kilometer is 'n
moet vir enigiemand wat van die lang pad
hou en die droë landskap geniet.
Die paaie tot in Walvisbaai is baie goed,
maar ek sal nie aanbeveel dat mense die
Botswana-deel in die nag ry nie. Ons het
heelwat karkasse van donkies of beeste wat
getref is langs die pad gekry. Die veld
is nie toegespan nie, so 'n mens moet jou
oë heeltyd oophou vir diere.
Namibië het weer koedoes wat sommer oor
'n draad in die pad spring.
Dié foto is 50 kilometer anderkant Swakopmund
geneem.
Groete
Batie en Shirley Hogewind
 Die
Subaru en Mabuasehube
Ek het 'n paar jaar gelede in 'n Engelse
reistydskrif die volgende oor 4x4's gelees
wat vir Kalahari-togte aanbeveel word: "Cross
the Botswana border, or choose one of the
special Kgalagadi trails and you'll definitely
require oomph of a genuine high clearance
4x4 (the likes of Subaru Foresters and VW
Synchros won't make it)."
Dit het my nogal laat dink en wonder toe
ek in Januarie 2006 die Subaru Forester
2,5 XS gekoop het.
In Augustus 2006 het die Subaru die paaie
in Moremi taamlik goed gevat en ook die
stuk dik sand verby Mankwe Bush Lodge, verder
noord.
In Augustus 2007 het ek die stuk grondpad
van Morokweng oor Heuningvlei tot by McCarthys
Rest met die Subaru aangedurf. Ons is daar
oor die grens tot by Tsabong.
Die Subaru was swaar gelaai met kamptoerusting
vir twee weke, 'n spaarwiel en twee jerry-kanne
op die dak. In Tsabong het ons pad gevra
na Mabuasehube; ons aanwyser het halfskepties
gevra: "Is this a 4x4?"
Ek het dadelik aan daardie artikel gedink
en omdat ons alleen gery het, het ek begin
twyfel. Die eerste 30 kilometer is 'n taamlik
goeie gruispad en daarna word dit 'n tweespoor-sandpad.
Die middelmannetjie is hoog en later word
dit 'n breë sandpad, waar elkeen ry waar
hy dink dit die beste is.
Ons is verby 'n uitgebrande Landy en het
tot by Mabuasehube gery. 'n Entjie in Mabuasehube
in, op die tweespoor-sandpad, moes ons agter
nog 'n Landy stilhou. Dié se brandstofpomp
het gelol. Vanaf Mabuasehube het ons met
'n breë stuk sandpad na Hukuntsi gery. Die
sand was baie los en hier en daar het die
Forester se pens gesleep, maar dit het nooit
gevoel of hy wil vasval nie. Die hittenaald
het ook nooit opwaarts beweeg nie.
My banddruk het ek op 1,6 gehou. Die laaste
ongeveer 16 kilometer voor Hukuntsi is baie
sleg en daar is diep sand wat nog meer losgetrap
word deur groot vragmotors. Ons het deurgekom!
Die totale afstand sand wat ons gery het,
was ongeveer 300 kilometer en dit het ons
amper sewe uur geneem om af te lê.
Ons het verder gery tot by Maun, later Sepopa,
Mohembo, Seronga, daar teruggedraai na die
Epupa-val toe en toe huiswaarts gekeer.
Soos die vorige jaar het ons byna 5 000
kilometer afgelê sonder enige probleem;
die Forester het net bly loop.
Ons was ook al 'n keer Kgalagadi toe, weer
grondpad van Morokweng af oor Severn, Van
Zyls, Askam tot by Mata-Mata - 600 kilometer
grondpad sonder moeilikheid.
Ek ooreis vir seker nie my voertuig nie.
Toe ek ná die Botswana-reis by die huis
kom, was daar nie eers sand op die enjin
nie en die lugfilter was eweneens skoon.
Al ekstras wat ek aangebring het, was staalplate
om die enjin en ewenaar te beskerm. In Augustus
is dit baie droog en die sand was baie los
en die middelmannetjies hoog.
Wat ek geleer het, is dat jy nie dié stasiewa
moet onderskat nie. Tree verantwoordelik
op en jy sal verbaas wees waartoe hy in
staat is as dit moet. Die Scooby skrik nie
maklik nie.
Sal ek dit weer doen? Ja, beslis! Ek sal
net nie die voertuig so swaar laai nie en
ek dink dit is dom om alleen met een voertuig
te ry.
Japie Steyn, Heilbron
Generasiegapings en speellys-versoek
So sit ek in Machadodorp en sukkel met 'n
laptop wat nie 'n klankkaart in het
nie en nie die GPS se geheuekaart lees nie,
toe Ismael van die Cash Store inkom.
Hy het warm springmielies in ruil vir tydskrifte
gebring. Nou, ek vermy popcorn verder
as vroue wat nie hard nies nie, maar Ismael
ken van rekenaars so ek seg: "Sit, seun,
en help die oom."
Ek het die knaap laasweek vir 'n spin gevat
nadat hy 'n sportmotor help poleer het en
hy was baie brawer as Willem of Gerhard.
Hy het byvoorbeeld sy onderbroek nie een
keer vuilgemaak nie. Ná die tyd wou hy ook
my voete soen. (Of dit vir die sywaartse
draaie of die lewendig tuiskoms was, weet
ek nie, maar ek hoop bostaande twee lafhartige
spoedvrate leer 'n les).
Ewewel, Ismael het 'n CD vol doef-doef-gemors
in die motor vergeet en dis nou die eiendom
van 'n karwasser in Johannesburg.
Wyl hy toe gou kyk of hy my met die rekenaar
kan help, speel ek vir hom musiek om sy
toetrede tot die volwasse wêreld aan te
help.
Was dít vir jou 'n openbaring.
U2? Ken dit glad nie. Pink Floyd? Hy vra
of dit iets met daai chick Pink te doen
het. Janis Joplin is "nogal naais, is dit
90's?" AC/DC, Toto en Beatles - "wassit
nie advertensie-.jingles nie?" Supertramp,
Toto, Led Zeppelin, Lennie Cravitz en ZZ
Top ken hy niks van nie.
Maar hy't aaklige Afrikaanse doef-doef-pop
op sy selfoon. Ek gee toe, die een se doef
is die ander se poef, maar as mens ná die
tyd nie die deuntjies kan neurie nie, kan
jy tou opgooi.
Die Indiër-knapie het egter hogere aspirasies
as poedels. Hy wil Afrikaanse chicks
date.
In Belfast. Waar die boere nog kort blou
broekies, kakiehemde en rygbykouse dra.
Ons algar weet, al praat Ismael vlot Afrikaans
en al ken hy De la Rey agteruit,
gaan hy met sulke leemtes in sy musiekagtergrond
nie lank onder Afrikaanse poppe oorleef
nie.
En so is Ismael weg met die ongekoude popcorn
en sy geheuestok vol huiswerk, onder meer
in die vorm van Karin Zoid se Plane Jane,
Jan Blohm se Groen Trui en 'n paar
Kerkorrels.
Wonder ek toe nou, raak ek nie dalk in my
dorpie agter wat nuwe plaaslike musiek betref
nie? Dus die versoek aan julle wat 'n goeie
tjoen waardeer: waarna luister julle wat
'n regte tromspeler het en met musikante
wat unplugged deuntjies speel wat
in jou kop bly draai?
(Wenk: Freshly Ground se DuhBie-DuhBieDuh
kwalifiseer, maar tel nie.)
Groetnis vanwaar die heuwels nou groen bult.
A, Machadodorp, Mpumalanga
Bespreek aanlyn vir SANParke-verblyf
SANParke het 'n intydse aanlyn-besprekingstelsel
op sy webwerf by www.sanparks.org/tourism/bookings
bekendgestel wat aan Jan Alleman die geleentheid
bied om alle verblyf-besprekings aanlyn
te doen.
Ná 'n eenmalige registrasie-proses kan toeriste
deur die verblyf-opsies by SANParke se wildtuine
en hul kampe blaai,'n toerprogram saamstel
en bewarings- en verblyfkoste per kredietkaart
betaal. Besprekings word per e-pos bevestig.
Marthinus van Schalkwyk, minister van omgewingsake
en toerisme, het tydens die World Travel
Market in Londen gesê die aanlyn-besprekingstelsel
was die volgende logiese stap vir SANParke
om Suid-Afrika internasionaal mededingend
te hou.
Meer as 580 miljoen mense wêreldwyd het
in 2006 die internet ingespan en sowat R15
miljard aanlyn bestee, waarvan aanlyn-aankope
en toerismeprodukte boaan die inkopielys
was. o Met ons ter perse gaan, kon die stelsel
besprekings tot 31 Mei 2008 fasiliteer.
|
