 Hein
Bester
Jis
Ek woon tans in Londen, Brittanje,
saam met seker amper 'n miljoen ander
Suid-Afrikaners. Ons bly nie almal
saam in 1 huis nie, net in die stad,
hoewel daar wel dele is waar die mense
hulself soos sardientjies inprop.
En nee, dis nie ander lande se mense
nie, dis ons eie Afrikaanse broers
(en susters). Maar so spaar mens geld
om die wêrled van die bokant
af te deurkruis en te toer.
Voor Londen was ek op Stellenbosch;
my 4-jaar B.SC MBK-graad (sport vir
die gewone mens en jokkel vir die
ouer gaarde) het ek in 5 jaar probeer
indruk, maar gelukkig in 6 klaar gekry.
Ná MBK het ek my HOD (onderwysdiploma)
gedoen. Van al die dinge in Suid-Afrika
wat ek mis, is die Stellenbosch se
berge seker bo-aan die lys.
In Londen, is ek in die onderwys
en geniet dit baie, maar dit was nie
altyd so nie. Ek het ook al my dae
van die kinders "Bliksems!"
noem, gehad. Al wat verander het van
daardie dae is dat hulle die woorde
begin aanleer het, so ek moet nou
meer kreatief wees met my Afrikaans.
Ek gee skool by 'n staatsskool in
Battersea, een van die suidelike voorstede
van die stad. Hier gaan die kinders
skool toe as hulle 3 is. Al voorvereiste
is dat hulle ge-pottie train moet
wees. Dit gebeur ook nie altyd nie,
het ek al met 'n skok en 'n nat hand
uitgevind.
Ek geniet dit om te toer en nuwe
plekke te verken, want dit gee my
die geleentheid om my passie, fotografie,
uit te leef. As dit nie 'n sonsondergang
op 'n Griekse eiland is nie, dan paragliding
in Turkye of sommer net die ou getroue
Eiffel-toring in Parys. Saam met dit
geniet ek dit om te skryf ook, hoewel
ek nie juis te veel tyd daarvoor kry
nie, maar tussen die klasse en die
kinders se neul, draai daar altyd
'n paar stories deur my kop.
Die Here het my vanjaar met 'n ongelooflike
lewensmaat geseën en nou verken
ons sommer alles weer van voor af.
Dit maak die toer baie meer opwindend
en soms onuithoudbaar, maar nooit
vervelig nie. Dis soos daardie ou
legendariese bande advertensie sê:
"Toer met 'n metgesel; 'n mooie
indien moontlik." Wel, ek doen.
|
